Zubizabala kanpinak bertatik bertara ditu Euskadiko natur parke nagusietako bi: Urkiola eta Gorbeia.

    Kanpina oso paisaia ederrak dituen landa-ingurune batean dago eta askotariko jarduerak egin ahal dira inguruko mendi, baso, urtegi eta haitzuloetan. Hori dela eta, Zubizabala kanpina leku paregabea da Natura maite dutenentzat.

URKIOLAKO NATUR PARKEA:

    Urkiolakoa da Euskadin natur parke izendatu zuten lehena. Hango paisaia alpino ikusgarria dela eta, “Bizkaiko Alpeak” esaten diote. Urkiolan, besteak beste, hau aurkituko duzu:

Sai arreak. Mundu osoan, Urkiola da sai arreek habia egiteko erabiltzen duten lekurik iparraldekoenetako bat.

Basoak eta paisaia malkartsua, euskal mitologiako mito askoren sorlekua. Urkiolako bazterrik ezkutuenak Anbotoko Mariren bizitoki eta beste elezahar batzuen gertaleku dira.

Baltzola haitzuloa eta Jentilzubi, inguru horretako erliebe karstikoak eratuak.

Atxarteko Eskalada Eskola, gure lurraldeko lehenetariko bat.

GORBEIAKO NATUR PARKEA:

    Gorbeiagane Araba eta Bizkaiko mendirik garaiena da, eta tontorretik Euskadiko natur parkerik handieneko paisaia liluragarria ikusten da. Gorbeiaganeko gurutze ospetsua inguru horretako mendizaleen ikurra da. Gorbeiako natur parkean hau aurkituko duzu:

Orein ikusgarriak. Urrian, orroaldia eta arren arteko borrokak ikus ditzakezu.

Ehun urtetik gorako harizti eta pagadi hosto-erorkorrak. Baso eder horietan, antzinako zenbait jarduera ikus ditzakegu oraindik ere, hala nola ikazkintza, karegintza eta basoko ustiapenak (gaztainak eta pagatxak).

Artzainak eta haien kultura tradizionala. Arratiako harana artzaintza oraindik bizirik dagoen leku bakanetako bat da.

Euskadiko mendigune karstiko nagusietako bat: Itxina. Hango haitzuloek, Atxak izeneko monolitoek, Atxulok eta beste formazio batzuek ospe handia eman diote mendigune horri.

URIBARRIKO URTEGIA:

                Hegazti urtar ugari eta askotarikoek igarotzen dute negua Uribarriko urtegian. Hori dela eta, barrualdeko inguru hori kontinenteko garrantzitsuenetako bat da.  

    Zubizabala kanpinaren inguruetan zuhaizti paregabea osatzen duten askotariko landare-espezie helduak ikus daitezke. Besteak beste, eta bereziki harrotzen gaituen adibide bat jartzearren, kanpinaren eremuan Euskadiko beste ezein lekutan ezin aurki daitezkeen zenbait haritz-espezie exotiko ditugu, hala nola Quercus palustris eta Quercus serrata, eta, horiez gain, izeidi helduak, ia ehun urteko ezkiak eta Lawsson nekostak eta abar.